علمی روایت سے انقطاع پر مبنی دینی تعبیر کا رجحان

اس موقف سے اصولی طور پرکسی اختلاف کی گنجائش نہیں کہ:’’روایت سے انقطاع وانحراف کا مزاج اور روایت کی ابدیت کا تصور رکھنا ‘‘ دونوں ہی غلط ہیں۔روایت انسان کی عقلی اورتمدنی ترقی کے نتیجے میں ہمیشہ ارتقا پذیررہتی ہے لیکن جس اطلاقی تعبیر کے ساتھ یہ بات کہی جاتی ہے ،اس پرمتعدد سوالات پید اہوتے ہیں۔سب سے پہلا سوال یہ ہے کہ اگر یہ تسلیم کرلیا جائےکہ روایت اپنے مکمل ڈھانچے کے ساتھ مجموعی شکل میں ارتقا اورتغیر کوقبول کرتی رہتی ہے، تومذہبی فکر میں’’مسلمات‘‘ کی کوئی حقیقت باقی نہیں رہ جاتی کیوں کہ اس ضمن میں عقائد واخلاق بھی آتے ہیں،جن کی بنیادیں اسلامی فکر میں بدیہی طور پرمسلمات کا درجہ رکھتی ہیں ورنہ دوسری صورت میں بات relativismتک پہنچتی ہے جس کے ساتھ مذہبی فکرآگے نہیں بڑھ سکتی۔اصل بات یہ ہے کہ روایت پرگفتگو کا مذہبی اورفلسفیانہ فریم ورک باہم مختلف ہے۔ اگراس تعلق سے فرق کو روا نہ رکھا جائے تو خلط مبحث پیدا ہوجاتا ہے۔

ہم جس نئے رجحان کی بات کررہےہیں اس کی امتیازی خصوصیت یہ ہے کہ وہ اسی مذہبی روایت کے فریم ورک میں نصوص کی تعبیروتفہیم پرسوال کھڑے کرتے ہوئے یہ دعوی کرتا ہے کہ نصوص کی تفہیم کے حوالے سے جومسائل پیش آرہے ہیں اس کابنیادی سبب ان نصوص کے ابتدائی شارحین کی نصوص کے فہم میں غلطیاں اور کوتاہیاں ہیں۔یہ اس رویے سے مختلف ہے جوجدیدیت پسند اختیارکرتے ہیں کہ نص کی تفہیم جو اس وقت کی گئی اپنے سیاسی وثقافتی سیاق میں وہ صحیح تھی البتہ اب سیاق بدل جانے کی وجہ سے اس کی تعبیرمختلف ہوگی۔اس میں شک نہیں کہ یہاں بھی جس اطلاقیت اور عمومیت سے کام لیا گیا ہے وہ نصوص کی مجموعی تعبیر کے حوالے سے نہایت مشکل آفریں ہے اور اس سے نئی قسم کی پیچیدگیاں پید اہوجاتی ہیں تاہم اس میں وہ قباحت باقی نہیں رہتی کہ لامحالہ دینی نصوص کی غلط تفہیم کا الزام اصحاب فقہ واجتہاد کی اولین نسلوں پر عائد کیا جائے۔میرا خیال ہے کہ اس رجحان کی اساس تحقیق وتنقیح سے زیادہ ادعائیت اور مفروضہ پسندی پر ہے۔مثال کے طور پر اس رجحان کے حاملین کا خیال ہے کہ قرآن مدون شکل میںرسول اللہ کی طرف سے امت کوحاصل ہوا۔عہد ابوبکروعثمان میں تدوین کی بات محض افسانہ ہے۔ اس قبیل کی اور بھی بہت سی مثالیں ہیں جن سے اندازہ ہوتاہے کہ اس رجحان کے حاملین کا ارتکاز اسلامی تاریخ کے حوالے سے ’’کیا ہوا‘‘یا ’’کیا ہوسکتاتھا‘‘ کے بجائے ’’کیا ہوناچاہیے تھا‘‘پر زیادہ ہے۔اس لیے اس اس ذہنی فریم ورک میں جوچیز فٹ نہیں ہوتی وہ اس کا انکار کردیتا ہے۔

میرے محدود علم کے مطابق برصغیر ہند میں دینی حلقے کی طرف سےسب سے پہلے مولانا مودودی علیہ الرحمہ نے اپنی کتاب ’’قرآن کی چار بنیادی اصطلاحیں‘‘ میں یہ نکتہ پیش کیا کہ چار قرآنی اصطلاحات: الہ ،عبادت،دین اوررب کی تفہیم صحیح طرح نہ ہونے کی وجہ سے قرآن کی تین چوتھائی تعلیم پردہ خفا میں چلی گئی۔لیکن یہ لے آگے نہیں بڑھ سکی اوراس تعلق سے معذرت خواہانہ موقف حاوی رہا لیکن اب اسی نوع کا موقف یا رجحان دوسرے اسلوب میں سامنے آرہا ہے۔اس لیے اس موقف کا سنجیدہ علمی تجزیہ ضروری ہے۔