تصورِ عقل، لازمی وجودی حقائق، اور محترم زاہد مغل صاحب : قسط سوم

اب محترم زاہد مغل صاحب کی دو عظیم دریافتوں یعنی ”لازمی وجودی حقائق“ اور ”حقائق کا اضطراری شعور“ کو دیکھ لینا بھی ضروری ہے۔ اوپر عقل کی جو تعریف گزری ہے اس میں یہ بات ضمناً آ گئی ہے۔ وہ فرماتے ہیں کہ ”ان اولیات کے عقلی ہونے یا لازمی وجودی حقائق ہونے کا مطلب یہ ہے کہ کسی شے کے وجودی احکام تین ہیں: واجب، محال و ممکن۔“

محترم زاہد مغل صاحب نے جدید فلسفہ، کلاسیکل علم الکلام اور عرفان (تصوف کی مابعدالطبیعات) کی اصطلاحات کا ایک ملغوبہ سا بنا دیا ہے جس سے وہ حجت الاسلام معلوم ہوتے ہیں۔ اب اسی فقرے کو لے لیں۔ وہ فرمائیں گے کہ ناچیز کو سمجھ نہیں آیا۔ لیکن یہ فقرہ وہ آدمی لکھ سکتا ہے جس کو فلسفے، کلام اور عرفان سے مس نہ رہا ہو اور وہ ان کے امتیازات سے بھی بے خبر ہو۔ ہونا یہ چاہیے ان کو اپنی یہ نئی دریافتیں الگ سے اور نئی اصطلاحات کی تعریفات کے ساتھ پیش کرنی چاہییں۔ میں نے ان سے استفسار کیا تھا کہ اولیات سے وہ کیا مراد لیتے ہیں۔ انہوں نے بس اتنا فرمایا کہ        First Principles۔ اگر تو یہ اولیاتِ عقلی ہیں تو pre-rational ہیں اور عقلی نہیں ہو سکتیں، جیسا کہ وہ فرما رہے ہیں۔ انہیں زیادہ سے زیادہ وجودی کہا جا سکتا ہے۔ اگر یہ اولیاتِ عقلیات ہیں تو ان کی نوعیت کچھ اور ہو گی، کیونکہ اولیاتِ عقلی اور اولیاتِ عقلیات ایک نہیں ہو سکتے۔ عقلیات سے میں عقلی علوم سمجھا ہوں، اور ان کی اولیات وہ نہیں ہو سکتیں جو عقل کی ہوں گی۔ کسی بھی عقلی علم کی تشکیل میں اصول داخل ہوتا ہے، جو جامع اور مانع ہوتا ہے اور جسے عقل ہی اپنے عقلی وسائل سے متعین کرتی ہے اور وہ قطعی اور مکمل عقلی ہوتا ہے جیسے کہ فزکس کے بنیادی اصول ہیں۔ لیکن کوئی بھی عقلی علم صرف عقلی اصول پر قائم نہیں ہو سکتا اس لیے عقل اپنے تشکیل کردہ ہر علم میں وجودی اصول لازماً داخل کرتی ہے جو اس علم کے مقاصد اور معانی کو متعین کرتا ہے۔ اس کی ضرورت اس لیے پڑتی ہے کہ عقل کا ”علمی تجربہ“ اس کے وجودی اصول سے خارج نہ ہو جائے۔

یہاں ”حقائق“ کے معنی پر بھی کچھ عرض کرنا ضروری ہے۔ جیسا کہ اوپر گزر چکا کہ عقل کی حد بس یہ ممکنات ہیں، اور عقل کا پیدا کردہ علم بھی ممکنات کا ہے۔ عقلی علم کی یہ تقدیر ہے کہ وہ ”حقائق“ کا محتویٰ (container) نہیں بن سکتا۔ جیسا کہ اوپر گزر چکا کہ وجوبات عقل کا موضوع نہیں ہیں۔ وجوبات سے مراد ”حقائق“ ہی ہیں۔ حقائق کا لفظ جن کے لیے بھی استعمال ہوتا ہے وہ سب ضروری ہیں، اور وہ جہانِ ممکنات ”میں“ نہیں ہیں اور یہ موقف علم الکلام کا ہے۔ حقائق غیب میں ہیں، یہ خبر غیب سے پتہ چلا، کیونکہ یہ کوئی علمی بات نہیں ہے، ایمانی ہے۔ عقل ان کے اثبات یا رد پر قادر نہیں ہے، انکار ضرور کر سکتی ہے۔ اس لیے حقائق کو ”ضروری“ یا ”لازمی“ کہنا سفاہت ہے، ازبس کہ وہ ضروری اور لازمی ہی ہیں کیونکہ وہ ”غیرضروری“ اور ”غیرلازمی“ نہیں ہو سکتے۔ علم الکلام واجب الوجود کی سلبی دلیل لانے تک ”حقائق“ سے تعرض نہیں کرتا۔ اس میں کچھ شک نہیں کہ علم الکلام اسما و صفات، وجود باری، معاد، جنت دوزخ وغیرہ کی بحث بھی کرتا ہے۔ یہ عقل تسلیم کی ابحاث ہیں۔ عقلِ محض کے عقلِ تسلیم بننے سے اس کی نوعیت پر کوئی فرق نہیں پڑتا، اس کا دائرہ کار یقیناً تبدیل ہو جاتا ہے۔ عقل تسلیم جائز طور پر اپنے ایمانی محتویات پر عقلی گفتگو کی مجاز ہے۔ علم الکلام حقائق کا علم نہیں ہے۔ وہ عرفان یا عرفانی مابعدالطبیعات ہے۔ اب زاہد مغل صاحب علم الکلام کو ”ریشنل میٹافزکس“ کہتے ہیں۔ اب میں کیا کروں، دعا ہی کر سکتا ہوں کیونکہ محترم زاہد مغل صاحب میرے لیے بھی دعا ہی کرتے ہوں گے۔